Државниот долг намален, Македонија петта најмалку задолжена земја во Европа

Со државен долг од 36,8 отсто Македонија е петта најмалку задолжена земја во Европа. Во првиот квартал од 2016 година државниот долг на Македонија бележи намалување од 38 отсто на 36,8 отсто, додека јавниот долг од 46,5 на 45 отсто, се наведува во соопштението од Министерството за финансии.

Повеќе задолжени од Македонија се Данска, Шведска, Финска, Холандија, Германија, Австрија, Велика Британија, Франција и други развиени европски економии. Што се однесува до земјите од регионот тие имаат двојно и повеќе од двојно поголем долг во однос на Македонија.
 
Во однос на тврдењата на дополнителниот заменик министер за финансии Кире Наумов дека се направени манипулации во пресметката на долгот од Министерството за финансии потсетуваат дека оваа методологија на пресметка врз база на проектиран БДП се користи од 2002 година, односно кога министер за финансии бил од Социјалдемократскиот сојуз. - Не е точно дека никаде не се користи таа методологија, туку е различно од земја до земја, се додава во соопштението. 

Впрочем, како што истакнуваат од Министерството за финансии, на крајот од секоја година се врши усогласување на јавниот долг со остварената стапка на раст на БДП. Така беше и во 2015 година кога стапката на долгот беше намалена бидејки растот на БДП ги надмина очекувањата.