Дојави за бомби во повеќе училишта во Белград

Неколку основни училишта во Белград утринава добиле информација дека во нив се поставени бомби.

За „Блиц“ е потврдено дека на адресата на ОУ „Дринка Павловиќ“ пристигнала дојава за бомба, а родителите биле известени да не ги носат децата во прва смена. Ова училиште изминативе денови беше во центарот на вниманието поради оставката на директорката поради насилство во училиштето.

Покрај ова училиште, дојави за поставување бомби добиле и основното училиште „Васа Пелагиќ“ во Котеж, „Бранко Ќопиќ“ во Видиковац, „Старина Новак“ во улицата Кнез Данилова во строгиот центар на Белград, јавуваат белградските медиуми.

Како што е потврдено за „Блиц“, пријавата стигнала и во училиштето „Вук Караџиќ“, а децата од тоа училиште се враќаат дома, како во училиштето „20. Октобар“ во Нов Белград.

Исто така, во општина Обреновац утрово во 5 часот и 15 минути на електронските адреси на неколку основни училишта во Обреновац биле испратени анонимни пријави за експлозивни направи.

Заради безбедност на учениците и вработените, во училиштето никој не влегол додека не завршила полициската проверка.