Директор на училиште им се заканувал на вработени: Ќе одите на митинг или нема нов Договор

Директор на училиште барал од вработените да следат митинзи на политичка партија. Им се заканувал и на договорците на дело дека ако не се појават на митинг, нивните договори нема да бидат продолжени.

Државната комисија за спречување на корупцијата објави предмет добиен од анонимен пријавувач, кој потоа е препратен до Комисијата во Јавното обвинителство за следење на евентуални изборни нерегуларности. 

-Наводите се однесуваат на тоа дека директор на основно училиште преку мобилна апликација врши притисок врз вработените со цел нивно појавување на партиски настани. А исто така се упатува дека истото лице, директорот упатува закани до вработените ангажирани со Договор на определено време дека истите нема да им бидат продолжени доколку не присуствуваат на посочените настани, кажа членката на ДКСК Билјана Каракошева – Шулев. 

Сепак, Антикорупциска не открива ниту кое е основното училиште каде директорот барал од вработените да „трчаат“ по митинзи, ниту во која општина е лоцирано училиштето. Одговарајќи на прашање на Сител, кажаа дека ќе мора прво да се консултираат со Јавното обвинителство дали доколку ги откријат овие детали ќе влијаат на истрагата. Па доколку Комисијата даде „зелено светло“, тогаш одговор ќе испрателе писмено. 

Го прашавме и Јавното обвинителство за кое училиште и за која општина станува збор, но до подготовка на прилогот оттаму не добивме одговор.