Димитров и Дачиќ на средба во Ниш
Министрите за надворешни работи на Македонија и на Србија, Никола Димитров и Ивица Дачиќ, денеска во Ниш ќе разговараат за можностите за унапредување на односите меѓу двете земји по неколкудневната дипломатската криза што беше надмината по телефонскиот разговор меѓу македонскиот премиер Зоран Заев и српскиот претседател Александар Вучиќ.
Предвидено е Димитров и Дачиќ по средбата да одржат и заедничка прес-конференција.
Во меѓувреме, персоналот од Амбасадата на Србија кој во неделата беше повлечен на итни консултации во Белград, од вчера почна да се враќа во Скопје. Враќањето на амбасадорката Душанка Дивјак Томиќ е најавено за 31 август, а ден подоцна се очекува таа да биде примена од македонскиот премиер Заев.
Македонската амбасадорка во Белград Вера Јовановска Типко, пак, вчера беше примена од српскиот претседател Вучиќ, кој ги повтори заложбите за унапредување на односите меѓу двете земји и најави дека ќе биде иницирано одржување заедничка седница на владите на двете земји до крајот на годинава.
Поканата за заедничка владина седница, се очекува утре на македонскиот премиер Заев да му ја пренесе српската премиерка Ана Брнабиќ на средбата што треба да ја имаат на неформалниот состанок на премиерите на земјите од Западен Балкан во Драч.
Со тоа треба да почне да се исполнува договорот во пет точки што го усогласија Заев и Вучиќ за принципите на идната соработка. Скопје и Белград, според договорот, ќе работат на зачувување и унапредување на билатералните односи, а секое евентуално несогласување ќе го решаваат исклучиво со дијалог. Македонскиот премиер Заев и претседателот на Србија Вучиќ се согласија и дека без оглед на сите политички разлики за одредени важни политички регионални прашања, Македонија и Србија заеднички ќе се борат не само за зачувување, туку и за унапредување на пријателските односи меѓу македонскиот и српскиот народ и граѓаните на двете земји.
Ново на Сител
-
Во прекин сообраќајот на патот Радовиш-Штип поради сообраќајка
-
Косовското МНР потврди дека на директорот на српската Канцеларија за Косово му е забранет влезот во Косово за Велигден
-
За Велигден претежно сончево и потопло време
-
Тепачка во Чаир - 5 лица повредени
-
Индонезија трајно ќе пресели 10.000 луѓе по серијата ерупции на вулканот Руанг
-
Полицијата ги растера пропалестинските активисти од зградата на универзитетот во Париз
-
Кривична пријава за злоупотреба на постапка за јавен повик и несовесно работење во службата
-
НАТО ги осуди кибер нападите насочени против демократските институции, безбедноста и слободното општество