Димитриеска Кочоска: Буџетот е оштетен за повеќе од 32 милијарди денари

Министерката на финансии Гордана Димитриеска Кочоска денеска, на прес-конференцијата за ребалансот, рече дека Буџетот е оштетен за повеќе од 32 милијарди денари. Таа очекува, како што напомена, за  констатираните состојби да реагира Основното јавно обвинителство.

Како што рече Димитриеска Кочоска, има многу доспеани обврски кои не се пријавувани.

-Можам да кажам дека има многу доспеани обврски и дека не се пријавувани. Понатаму надлежноста е на другите иституции. Јас ги кажувам констатираните состојби во Министерството за финансии, истакна Димитриеска Кочоска. 

Таа претходно, соопштувајќи ја владината одлука за ребалансот на Буџетот, информира дека за плати се обезбедени 4,1 милијарда денари, а за исплата на пензиите пет милијарди денари. Инфлацијата е предвидена на ниво од 3,5 отсто, а растот на нето платата за 13 проценти. Вкупните приходи во Буџетот се планирани на 318 милијарди 150 милиони денари што е за 8,22 милијарди зголемување, планирнао е и зголемување на даночните приходи од сопствени сметки, додека расходите се планирани на 362 милијарди 816 милиони денари што е зголемување од 19,178 милијарди денари.