Деветто издание на Скопје постер Фестивал

Деветтото издание на Скопје постер фестивал ќе се одржи од 21-ви до 30-ти ноевмри годинава во Музејот на Град Скопје, на тема  „Криза на идентитетот“.

Младите надежи на графичкиот дизајн од целиот свет аплицираа на 9. Меѓународен студентски конкурс за плакат. Поттикот за избор на оваа тема, велат организаторите, е потребата од реакција против етничката, културната, верската, возрасната и половата подвоеност, следствено врз идентитетските прашања е фрлено поинакво светло.

Во првите три дена од Фестивалот ќе се организираат и тематски работилници.

Жирито е составено од експерти од сите гранки на графичкиот дизајн – илустратори, типографи, калиграфи, плакатисти. Меѓу нив се најдоа Мишел Буве од Франција, Фонс Хикман од Германија, Фин Нигард  од Данска, Ришард Каја од Полска и Тони Васиќ  од Македонија кои ќе одржат свои презентации и работилници на теми: дизајнирање на џез плакат, дизајнирање на социјален постер, дизајнирање на постер за промоција на Македонија како туристичка дестинација, информираа од Плакарт.

Интересот за овој конкурс е видлив преку поголемиот број пристигнати плакати, оносно 32% повеќе од минатата година и се поголем број на академии во рамки на своите академски програми го воведуваат и овој конкурс, истакнуваат од Плакарт.

Победниците, како што најавија организаторите, ќе бидат објавени на отворањето на 9. Скопје постер фестивал, на 21 ноември во Музејот на Град Скопје, кога ќе бидат отворени и други поставки, како што се изложбата на специјална селекција на плакати, плакати од победниците на минатогодинешниот конкурс, како и плакатите кои беа работени на работилници за овогодинешниот 9. Скопје постер конкурс.