Детската оперска претстава „Мала волшебна флејта“ ќе гостува во Битола

Националната установа Центар за култура-Битола соопшти дека викендов на големата сцена во центарот ќе гостува Македонската опера и балет - МОБ чии уметници ќе ја изведат адаптираната опера на македонски јазик „Мала волшебна флејта“ од Волфганг Амадеус Моцарт, во режија на Урсула Хорнер.

Од НУ Центар за култура-Битола информираат дека со ова второ последователно гостување на МОБ во Битола се потврдува договорот за соработка меѓу двете национални установи за поинтензивно одржување на културни настани и манифестации.

- МОБ продолжува со практиката за музичка едукација на најмладата популација. Младите битолчани со нетрпение го очекуваат гостувањето на МОБ со детската оперска претстава „Мала волшебна флејта“ закажано за в недела навечер од 18 часот. Преку овој културен настан децата ќе добијат одговори на повеќе отворени прашања кои ги нудат волшебникот, кралицата на ноќта и други ѕвезди од познатата приказна исполнета со прекрасната музика на Моцарт, посочуваат од секторот за односи со јавност на НУ Центар за култура-Битола.

Во „Мала волшебна флејта“ настапуваат Денис Димоски, Кристијан Антовски, Александра Лазаревска-Василев, Ана Ројдева, Борко Биџовски, Марија Наумовска, Билјана Јосифов, Николина Јаневска, Дејан Стоев и Катерина Стојановска.