Дестабилизирање на времето од вечер, утре на повеќе места пороен дожд, грмежи и ветер

Променливо облачно, на повеќе места нестабилно време со пороен дожд, грмежи и засилен ветер, локално и во форма на невреме, прогнозира за утре Управата за хидрометеоролошки работи. 

Времето ќе се дестабилизира денеска попладне, во вечерните часови и во текот на ноќта на повеќе места ќе биде нестабилно со пороен дожд, грмежи и засилен ветер.

Според прогнозата на УХМР, локално процесите ќе бидат во форма на невреме, со интензивен пороен дожд за кратко време, силен ветер и појава на град. 

-Пообилни врнежи во овие два дена ќе има во западните и централните делови каде локално се очекува да наврнат над 30 литри на квадратен метар. Дневната температура ќе опадне за 4 до 6 степени, најави УХМР.

Од вторник времето ќе биде променливо облачно со сончеви периоди и со услови за слаб локален дожд.