Делави оптимист за демаркацијата на косовско-црногорската граница

Американскиот амбасадор во Косово, Грег Делави, е оптимист дека во текот на неделава косовскиот Парламент ќе го  ратификува Договорот за демаркација на границата со Црна Гора.

Во интервју за порталот „КосСев“, Делави изјави дека изгласувањето за демаркацијата не било никогаш поблиску отколку деновиве.

- Признавам дека сум виновен за фактот што сум оптимист. Сметам дека е факт оти не сме биле никогаш поблиску од денес, за да се изгласа Договорот за демаркацијата во Парлементот, бидејќи 80 или повеќе гласови се потребни за тоа, посочи Делави.

Тој додаде дека ако демаркацијата се изгласа во текот на оваа недела тоа „би било прекрасно“, како и оти договорот би бил во интерес на  сите граѓани на Косово.

По двете неуспешни продолженија на вонредната седница на косовскиот Парламент на која на дневен ред беше токму демаркацјата беше соопштено дека седницата ќе продолжи утре, но засега нема потврда за тоа.

Парламентарното мнозинство нема доволен број гласови (80 од 120 пратенци), кои не ги обезбеди ни по средбата со парламентарната група на Српска листа со косовскиот државен врв. Бидејќи Движењето Самоопределување цврсто стои на ставот дека е против договорот, неговата судбина и понатаму останува во рацете на пратениците од Српска листа.

Договорот е потпишан во август 2015 година и е ратификуван од страна на црногорскиот Парламент.