Дејвид Швендиман е назначен за главен обвинител на Специјалниот суд за воени злосторства на Косово

Американецот Дејвид Швендиман е назначен за главен обвинител на Специјалниот суд во Хаг за истрага на воените злосторства, извршени за време на војната на Косово во 1998 и 1999 година.

Специјалното обвинителство е дел од Специјалниот суд за Косово, чие формирање беше најавено на почетокот од годинава. Судот ќе се занимава со злосторства, извршени од т.н. Ослободителната војска на Косово (ОВК) врз етничките малцинства и политичките противници. Тој ќе работи според косовските закони, но од безбедносни причини и поради заштита на сведоците, неговото седиште ќе биде во Хаг.

Пред именувањето, Швендиман беше главен обвинител на специјалниот истражувачки тим на ЕУ, формиран во 2011 година, со цел да води независна истрага за обвиненијата, кои биле содржани во извештајот на Дик Марти од Советот на Европа за трговија со човечки органи на Косово. Во периодот од 2006 до 2009 година Швендиман работел како меѓународен обвинител во БиХ.