Дебата за креирање безбедни и здрави работни места

Дебата за унапредување на бипартитниот дијалог за безбедност и здравје при работа во компаниите за креирање безбедни и здрави работни места ќе се одржи денеска во организација на „Македонското здружение за заштита при работа“ во соработка со „Сојузот на Синдикатите на Македонија“.

Целта на јавната дебата, како што информираат организаторите, е да се отвори дискусија за мислењата и ставовите на сите засегнати страни во однос на унапредувањето на безбедноста и здравјето при работа и промовирањето на безбедни и здрави работни места.

На дебатата ќе присуствуваат граѓански организации, работодавачи, синдикални организации, образовни институции, медиуми, претставници од релевантни сектори и други засегнати чинители.

Дебатата е во рамки на проектот „Зајакнување на партнерствата на граѓанското општество и државните институции во креирање и унапредување на правото за безбедна и здрава работна средина - Основно човеково право“.