Дебата за еколошките прашања во Струга

Во рамки на проектот Мобилен Парламент, Граѓанската Асоцијација МОСТ денеска во Струга организира јавна средба на тема „Пратениците и граѓаните отворено за еколошките прашања во Стругa“.

Целта на настанот е преку директна комуникација со избраните претставници отворено да се разговара за еколошките прашања кои ги засегнуваат сите граѓани на Струга. Загадувањето на животната средина од локалната депонија негативно влијае и на здравјето на граѓаните, како и на економскиот развој и туризмот во регионот. Дополнително загрижувачки се и последните информации за загадената вода за пиење.

На дебатата можат да присуствуваат сите заинтересирани граѓани. На неа ќе говорат пратениците, а поканети се и претставници од Министерството за животна средина и просторно планирање, од локалната самоуправа и од невладиниот сектор.

Проектот „Мобилен Парламент“ на Граѓанска асоцијација МОСТ е поддржан од Европската унија, преку Европскиот инструмент за демократија и човекови права.