Дали е истата како онаа на СДСМ?

Претседателот на СДСМ, Венко Филипче вели дека денеска во Владата премиерот Христијан Мицкоски и министерот за европски прашања Орхан Муртезани во целост го потврдиле, а како што нагласува на 16 септември и ќе го потпишат, Планот за раст кој бил подготвен од Владата на СДСМ.

-Без да изменат речиси ништо во тој план, тие ја призна добро сработената работа и спроведената Реформска агенда од страна на СДСМ, пишува Филипче на Фејсбук.

Според него, ниту едно ветување на Мицкоски не е исполнето.

-Ниту едно ветување на Мицкоски кое тој ревносно го повторуваше не успеа да го реализира. Напротив. Мицкоски го прифати целосно Коридорот 8 и одеднаш проектот не завршувал како тунел во планина. Сега тој проект е добар. Мицкоски се согласил и дека нема да се распуштаат Советите за судии и јавни обвинители, иако со денови во јавноста кажуваше дека ќе го направи тоа. Јасно е дека ниту ЕУ, ниту било која меѓународна институција, не дозволува политичко мешање во изборот, кое очигледно беше цел на Мицкоски, нагласува Филипче. 

Според него, чесно би било ова да го признае пред граѓаните отколку партијата да измислува спинови и паравани за нереализираните ветувања. Но, додава, тоа говори за него и неговиот начин како ја разбира политиката. 

Претседателот на СДСМ потенцира дека нема простор за импровизации, ниту пак, како што нагласува, за  лажни ветувања и поигрување со емоциите на граѓаните кога се во прашање стратешките цели на државата и ЕУ интеграциите.