Црвен крст: Ситуацијата во Алепо се повеќе се влошува

Хуманитарната ситуација во источните делови на сирискиот град Алепо, кои се под контрола на бунтовниците, секој ден се повеќе се влошува, а сириската Влада продлжува со напади на населените реони, соопшти претставник на Меѓународниот комитет на Црвениот крст (МКЦК).

- Резервите од храна се при крај, поради што цените на најнеопходните производи, како што се леб, брашно, леќа и млеко, драстично се зголемуваат, истакна портпаролката на МКЦК во Дамаск, Инги Седки.

Во повеќето квартови од градот драстично е намалено и количеството на гориво и многу луѓе останале без електрична енергија и греење за претстојната зима.

Повеќе од 250.000 луѓе се блокирани во источниот дел на Алепо. од почетокот на овој месец ОН се обидува да склучи договор со кој ќе се дозволи доставување на хуманитарна помош и евакуирање на повредени лица.

- Итно се потребни гаранции за безбедност од страна на завојуваните страни во Алепо, со цел да обезбедиме хуманитарна помош за населението, нагласи Седки, чија организација нема пристап до реонот уште од април.