Црна Гора обвини руски државјани за поттикнување убиство на Ѓукановиќ

Црна Гора го обвини рускиот државјанин Едуард Широков за планирање убиство на поранешниот црногорски премиер Мило Ѓукановиќ „преку поттикнување“, јави ТАСС.

Како што соопшти црногорскиот специјален обвинител Вељко Ратовиќ, рускиот државјанин е обвинет за создавање криминална организација и за обид за извршување терористички акт.

- Доколку Руската Федерација не ни ги предаде своите државјани Едуард Широков и Владимир Попов, тогаш ние ќе ги судиме во отсуство, посочи обвинителот.

Претходно. Специјалното јавно обвинителство на Црна Гора соопшти дека објавило меѓународната потерница по двајцата руски државјани и тројца Срби под сомнеж за „создавање криминална организација и за тероризам“.

Црногорските медиуми јавуваат дека по двајцата руски државјани - Едуард Широков и Владимир Попов - се трага преку Интерпол под обвиненија за подготовка на државен преврат на денот на парламентарните избори во Џрна Гора, што се одржаа на 16 октомври.

На 6 ноември главниот специјален јавен обвинител на Црна Гора, Миливој Катниќ, изјави дека група граѓани на Србија, Црна Гора и Русија на 16 октомври се обиделе да извршат терористички напад. Според него, организатори на оваа група се руските националисти, кои сметале дека власта на чело со премиерот Мило Ѓукановиќ, не може да се смени преку избори, туку треба да се урне со сила.

На денот на парламентарните избори во Црна Гора беа уапсени 20 државјани на Србија под сомнеж дека подготвувале терористички напади.