Бројот на загинати во циклонот во Мозамбик се искачи на 598

Властите во Мозамбик денеска соопштија дека бројот на загинати во циклонот Идаи, што пред две недели ја погоди земјата, се искачи на 598, додека хуманитарните работници се борат со епидемија на колера.

Светската здравствена организација објави дека се пријавени најмалку 1.052 случаи на колера, а едно лице починало.

Оваа болест се шири во градот Беира, кој има половина милион жители, откако минатата недела во него беше прогласена епидемијата.

Околу 900.000 вакцини пристигнаа во Беира, а кампањата за вакцинација ќе почне деновиве.

Голем број луѓе немаат пристап до чиста вода, а случаи на колера се пријавени и надвор од Беира.

Во циклонот Идаи, настрадаа најмалку 259 лица и во соседното Зимбабве и најмалку 56 во Малави.