Битолскиот магазин за хумор и забава „Без навреда“ одбележа 10 години од излегувањето

Битолскиот магазин за хумор и забава „Без навреда“ одбележа 10 години од излегувањето на првиот број во октомври 2005 година.

Панде Димитровски, основач и главен и одговорен уредник на магазинот потенцира дека станува збор за локално списание со национални амбиции, затоа што, подвлече, кој се смее, зло не мисли.

- Бидејќи не постои локален хумор не може да се каже дека сме локално списание, иако дејствуваме на територијата на Битола и малку пошироко, но за жал не сме стигнале до главниот град . „Без навреда“ е магазин за хумор со повеќе рубрики како што се „Измислено интервју“, „Тема на месецот“, „Вицотека-шеготека“, анегдоти... Насловот и мотото на списанието од првиот број и денес е „Без навреда“ и до ден денешен, посебно заради рубриката „Коприва објавува“ ниту едно лице не упатило забелешка, закана или тужба за тоа што сме го објавиле, истакна Димитровски.

Во изминатата деценија, магазинот за хумор и забава „Без навреда“ имал бројни редовни и повремени соработници, а првиот број е отпечатен и дистрибуиран на 17 октомври 20015 година.

- Интересно е да се каже дека во овој момент во Битола, наспроти другите градови во Македонија, живеат најмногу лица  што цртаат и објавуваат карикатури а тоа се Спиро Џајко, Блаже Докулевски, Миле Милевски, Кети Радевска, Панде Петровски, Гаврил Докулевски и други автори кои подготвуваат духовити текстови, приказни и хуморески, посочи Димитровски на одбележувањето на јубилејот – 10 години „Без навреда“.