„Баскерфест“ во Крушево

На Градскиот плоштад во Крушево синоќа посетителите ја проследија тричасовната програма на Меѓународниот и мултикултурен уличен фестивал „Баскерфсет“, кој годинава го слави својот 10-годишен јубилеј. 

Точка со оган, магионичар, акробатот од Чиле „Господин Мустаќо“, креативна работилница, акробатски скокови..., беа дел од програмата. 

„Баскерфест“ е дел од годинашната програма на „Крушевското културно лето“, кое е поддржано од општина Крушево и Министерството за култура. 

Општина Крушево информира дека сите посетители ги очекува богата културна понуда. На Градскиот плоштад в сабота, на пладне под мотото „Говориме различно, танцуваме исто“, ќе се игра танцот зумба од ученици од различна етничка и верска припадност. Овој настан е дел од програмата „Градиме мостови“, поддржана од Мисијата на ОБСЕ во Скопје и Министерството за образование.

На 15 јули во Крушево ќе пристигне Сашко Коцев, а од 25 јули почнува манифестацијата „Крушево етно – град“.