Баевска-Вучковиќ: Намален бројот на колапси ова лето

Над 14.630 граѓани се прегледале на бесплатните превентивни прегледи за заштита од  високите температури и топлото време, што ги спроведоа медицински екипи од ЈЗУ Здравствен Дом Скопје од 7 јули до 6 септември оваа година.

На три пункта, еден на Кејот на реката Вардар и два мобилни, на 9.141 граѓани им бил измерен крвен притисок од кои кај 392 лица бил откриен зголемен притисок, пришто биле упатени кај матичен лекар за понатамошни прегледи. Кај 35 лица било забележано значително зголемување на крвниот притисок и биле упатени како итни-ургентни случаи во дежурните пунктови, информираше денеска на прес-конференција директорката на Здравствен дом Скопје, Татјана Баевска-Вучковиќ.

За четири години, откако се спроведуваат бесплатните прегледите, информира Баевска-Вучковиќ, крвен притисок им е измерен на вкупно 34.702 граѓани. Промотивен материјал подигнале 14.880, 1.753 се новооткриени случаи на зголемен крвен притисок, а 93 лица биле итни-ургентни случави коишто биле упатени во дежурните пунктови или во Ургентниот центар „8-ми Септември“.

- Ова е четврто лето во кое колапсите беа сведени на минимум. Во текот на неколку дена од месецот имавме еден до два колапси и главно беа на отворено место, истакна Баевска-Вучковиќ.

Колапсите, информира таа, најчесто биле кај помладата популација, при што младите биле советувани да примаат повеќе течности и храна за да се избегне губење на свеста или премаленост.

Според Баевска-Вучковиќ, бројот 194 бил умерено растоварен во однос на другите лета, а за тоа, како што рече, активностите покажуваат дека граѓаните ги почитуваат препораките.