Авионот на Меланија Трамп принудно слета поради чад од леталото

Авионот на првата дама на САД, Меланија Трамп, беше принуден да се врати на аеродромот, откако е забележан чад од леталото.

Новинарите присутни во авионот информираа дека причина за чадот бил „механички проблем“.

Како што јави Си-Би-Ес, авионот слетал во воената база од каде што полетал, а првата дама се чувствува добро.

Десет минути по полетувањето авионот почнал да остава трага од чад, а во него се чувствувал мирис на изгорено.

Американските медиуми јавија дека еден од членовите на екипажот пријавил „проблеми со комуникацискиот уред, кој се прегреал“, но Белата куќа не ги потврди овие наводи.

Меланија Трамп отпатува од Вашингтон за Филаделфија, на средба со деца со синдромот на неонатална апстиненција.

Си-Ен-Ен јави дека првата дама на САД подоцна го продолжила патот кон Филаделфија со друг авион.