Аселборн: Велика Британија отстапува од надворешно-политичкиот курс на ЕУ

Луксембуршкиот министер за надворешни работи Жан Аселборн изјави дека Велика Британија почнала да отстапува од заедничкиот надворешно-политички курс на Европската унија уште пред Брегзит да стане факт.

- Велика Британија веќе и кажа збогум на заедничката европска политика. Тоа е факт, рече Аселборн во интервју за германскиот весник „Зидојче зајтунг“.

Тој упати критика до одлуката на Лондон да се дистанцира од резултатите на меѓународната конференција во Париз за решавање на блискоисточното прашање.

- Премиерот Тереза Меј говори дека Велика Британија ја напушти ЕУ, но не и Европа. Во тој случај Велика Британија треба да се придржува во иста линија со Европа, рече луксембуршкиот министер.