Андреј Пленковиќ прв и засега единствен кандидат за лидер на ХДЗ

Пратеникот во Европскиот парламент Андреј Пленковиќ денеска ја предаде кандидатурата за претседател на Хрватската демократска заедница (ХДЗ), а внатрепартиските избори ќе се одржат на 17 јули.

Тој посочи дека неговата кандидатура е поддржана со 35.000 потписи на членови на ХДЗ.

Пленковиќ најави дека в петок ќе ја претстави својата програма.

Тој е единствен кандидат за лидерската позиција на ХДЗ откако министерот за култура Златко Хасанбеговиќ претходно се повлече од трката.

- Би сакал да има повеќе кандидати бидејќи тоа е добро за внатрепартиската демократијата. Но, тоа е одговорност на секој член и тоа е прашање за нив, посочи Пленковиќ.

Членовите на ХДЗ ќе можат да гласаат на внатрепартиските избори од кој било град во Хрватска.