Акција за стерилизација на бездомните животни во општина Центар

Јавното претпријатие Паркинзи на општина Центар денеска ја почна акцијата за стерилизација на бездомните животни „Центар на 4 нозе“.

Директорот на претпријатието Саша Богдановиќ заедно со Татјана, жител од населбата Капиштец, го однесоа првото бездомно куче од Центар на стерилизација во ветеринарната амбуланта „Пет Вет“ каде на кученцето му беше направена хируршка интервенција на јајниците, јајоводите и матката.

- Со стерилизација животните живеат подолг и поздрав живот. Стерилизираните животни имаат смирен хормонален статус и не се здружуваат во глутници, се намалува нивното размножување и се намалува бројката на луѓе на кои им пречат животните. Со оваа хуманитарна акција сите заедно можеме да ја подигнеме свеста и да го спречиме неконтролираното размножување на бездомните животни во Општина Центар, изјави Богдановиќ.

Во следниот период, ЈП „Паркинзи“ на Општина Центар и здружението за заштита на животни „Анима Мунди“ најавуваат дека ќе продолжат со организирање на хуманитарни настани со цел да се намали бројката на гладни, болни, тепани и убиени животни на улиците во општина Центар.