АБА: МЗТ подготвен за Партизан

Вечерва со натпреварите Цедевита-ФМП и МЗТ-Партизан ќе почне новата сезона во регионалното кошаркарско натпреварување, АБА. Изминатите три сезони титулата ја освојуваше Црвена звезда, која и покрај бројните промени во ростерот повторно е најголемиот фаворит за освојување на трофејот. Покрај Црвена звезда, во потесниот круг фаворити за титулата се вбројуваат Цедевита и Будуќност.

 

Македонски репрезент и оваа сезона ќе биде шампионот од Аеродром, екипата на МЗТ. „Штрковите“ во новата сезона влегуваат со нов тренер, Александар Тодоров се врати во клубот и со целосно изменет тим во однос на претходната сезона, во која дури во финишот МЗТ избори опстанок.

 

Клубот, кој сезонава работи со намален буџет, се определи во тимот да има најмногу домашни играчи (сите тие се репрезентативни кандидати), а од странците тука е Јуре Лалиќ, кој беше во тимот и во претходната сезона, односно Американците Ерик Гарсија, Даниел Џенсен и Брет Бери.

 

МЗТ новата сезона ја отвора вечерва од 20 часот во СЦ „Јане Сандански“ против шесткратниот АБА шампион, белградски Партизан.

 

„Добро работевме во подготвителниот период. Подготвени влегуваме во новата сезона, се надевам дека ќе ја започнеме со победа. Го гледавме Партизан. Знаеме дека е нова екипа, млада, доста трчаат. Ќе мора да ја одбраниме таа нивна транзиција, а во нападот да знаеме каде треба да нападнеме и да бидеме ефикасни“, вели капитенот Дамјан Стојановски, кој остана во МЗТ откако целата претходна сезона ја пропушти поради повреда.