За килограм боровинки од Кожуф се плаќаат до 150 денари

  За килограм боровинки набрани од планината Кожуф се плаќаат до 150 денари. Стартуваше бербата на шумските плодови во кавадаречкиот дел на Поткожувјето. За разлика од други години кога во планината буквално вриеше од берачи на боровинки сместени во импровизирани шатори, годинава е многу мал бројот на оние кои пешачат и до 20 километри на ден, за да наберат од темните топчести плодови за кои веруваат дека имаат лековити својства.

 

-Сезонава слабо има берачи на боровинки по терените на кои вообичаено ги има со години наназад. За време на бербата престојуваме по неколку дена во импровизирани живеалишта. Се наоѓаме на околу три километри од македонско грчката граница. Оваа година ги нема и откупните пунктови за боровинки што своевремено ги имаше во планината. Сега главно плодовите ги береме по нарачка за семејства кои ги бараат за здравје. Но, во услови кога боровинки има помалку, поголема е километражата што се оди, за да се најдат и тоа малку кои ги има, рекоа за МИА жители на поткожувските села, кои традиционално секој септември берат шумски плодови на Кожуф.

 

Дека во овој дел на Македонија е намален родот на боровинки поради неколкуте временски неприлики што ја зафатија Тиквешијата во изминатиот период, потврдува и Петко Ристовски, шеф по заштита на шуми во „Македонски шуми“, подружница „Бор“ од Кавадарци.

 

- Доказ повеќе за тоа е и енормно намаленот број издадени дозволи од наша страна, за собирање на лековити растенија и шумски плодови. Интересот за такви дозволи беше многу мал. Наспроти 145 издадени дозволи во 2016 година, сега имаме издадено само десет, нагласи Ристовски.