Вулин: Која е смислата на продолжување на преговорите со Приштина

Информациите од Приштина за евентуално суспендирање на формирањето на Заедницата на српски општини се апсолутно неразбирливи и се поставува прашањето има ли смисла Договорот од Брисел, ако една од страните може да го суспендира без да сноси некаква одговорност, изјави денеска српскиот министер за труд и социјална политика Александар Вулин.

Тој наведе дека непочитувањето на дадениот збор значи и дека Приштина ги смета Србите за „дестабилизирачки фактор“, кој не треба да го има во Косово.

Косовската опозиција инсистира Владата во Приштина да го повлече потписот од Договорот за Заедницата на српски општини, за кој оценува дека е формирање на „држава во државата“.

Косовскиот премиер Иса Мустафа изјави дека ако Уставниот суд го оцени Договор со Белград за формирање на Заедницата на српски општини како спротивен на косовските закони, тој нема да биде имплементиран.

Претседателката на Косово, Атифете Јахјага денеска официјално побара од Уставниот суд да го оцени Договорот. Судот треба да одговори во рок од 60 денови.