Вооружена драма во кумановско: Им впериле пиштол, ги ограбиле и ги врзале со кабел

Вчера во 12:00 часот во Полициската станица во Куманово, З.С. (51) од Куманово пријавил дека во неговата викендица во „Зубовска река“, атар на село Зубовце, кумановско, над него и неговиот сосед Л.Д. (64) од Куманово, двајца непознати сторители извршиле разбојништво.

Кога З.С. и Л.Д. дошле пред влезната врата на викендицата, излегло непознато машко лице кое им вперило пиштол и им рекло да влезат внатре, каде било уште едно непознато лице.

Сторителите им пребарале по облеката и од З.С. одзеле околу 8.000 денари и мобилен телефон, а од Л.Д. одзеле околу 2.000 денари и мобилен телефон.

После тоа, едното лице држело пиштол вперен кон нив, а другото со кабел им ги врзало рацете и нозете, по што излегле од викендицата и со автомобил „Рено Сеник“ со кумановски регистарски ознаки, сопственост на З.С., побегнале во непознат правец.

По неколку минути и двајцата успеале да се одзврзат, излегле надвор и од соседите побарале телефон и настанот го пријавиле во полициска станица.

Од извршниот увид во викендицата, и по кажување на оштетениот, од викендицата недостасуваат телевизор, сателитски ресивер, ДВД , појачувач, музички миксети и други предмети.

Се преземаат мерки за пронаоѓање на сторителите и за целосно расчистување на случајот.