Во Велес изложба од Интернационалната ликовна колонија „Дрен“

Во организација на Народниот музеј од Велес и Центарот за култура „Марко Цепенков“ од Прилеп синоќа во Ликовниот салон во Велес прват беа изложени дела од 8-та Интернационална ликовна колонија „Дрен“.

 

На изложбата се претставени 26 дела - масло и акрил на платно од вкупно 30 и две скултури, едната од дрво, а другата од метал. Делата се на 12 автори од Србија, Турција, Русија и Македонија, учесници на Колонијата.

 

Изложбата ја промовира Тони Чатлески, директор на ЦК „Марко Цепенков“ од Прилеп. 

 

Тој рече дека оваа Интернационална колонија, препознатлива по селото Дрен и манастирскиот комплекс „Свети Илија“, во прекрасна природа, е инспирација за уметниците-учесници секој јули.

 

- Прекрасната природа и манастирот се инспирација за делата кои се создаваат, а досега во овие осум години се изработени околу 300. Во иднина планираме освен слики и скулптури кои првпат беа изработени на годинашната колонија, да се насочиме кон постмодерната уметност и инсталацијата како ликовен израз, и по тоа да бидеме препознатливи и да се разликуваме од останатите, потенцира Чатлески.

 

Според организаторите, поради лошиот пат од Прилеп до селото Дрен во должина од 30-тина километри, идната година колонијата ќе се одржува во Прилеп.

 

Делата од годинашната Интерационална ликовна колонија „Дрен“ по Велес, ќе бидат изложени и во Македонски Брод, Кавадарци, Кичево, Неготино и други градови во земјава.