Во руски напад со дронови врз автобус во Украина загинаа девет лица, четворица повредени

Во руски напад со дрон врз автобус во Сумскиот регион загинаа девет лица, а четворица се ранети, соопштија утринава украинските власти, во инцидент што се случи неколку часа откако Москва и Киев ги одржаа своите први директни мировни преговори во последните три години.

„Ова не е само уште едно гранатирање, ова е цинично воено злосторство“, напиша украинската национална полиција во објава на Телеграм.

Руските медиуми, повикувајќи се на соопштение од Министерството за одбрана,наведоа дека руските сили со беспилотни летала нападнале подрачје за собирање украинска воена опрема во Сумискиот регион.

Игор Ткаченко, шеф на воената администрација на Суми, на Телеграм изјави дека е во тек спасувачка операција.

Состанокот меѓу руските и украинските претставници во Турција вчера не донесе привремен прекин на огнот. Тоа беше првиот директен дијалог меѓу двете страни од оној во првите месеци од војната што Русија го започна во февруари 2022 година.

Украинската полиција објави фотографии од речиси уништеното темно сино патничко возило, со откорнат покрив и скршени прозорци.

Ројтерс не можеше независно да го потврди украинскиот извештај.

Двете страни негираат дека нападите се насочени кон цивили, иако илјадници веќе загинаа во конфликтот, од кои огромното мнозинство се Украинци.