ВМРО-ДПМНЕ: СЈО се меша во локалните избори

СЈО директно се меша во претстојните локални избори и се обидува да влијае на резултатите, сметаат од ВМРО-ДПМНЕ.

Доказ за тоа, според партијата, е тоа што, како што посочуваат, СЈО без никаков аргумент во предметите тенденциозно опфатил двајца членови на Државната изборна комисија и пет судии на Управниот суд.

- На петте судии веќе им е симнат и имунитетот. Направен е преседан. Се води кривична постапка против нив само заради судско убедување.  Заднината на овој преседан е друга. Токму Управниот суд треба да одлучува по жалбите околу изборниот процес и на овој начин, преку СЈО, СДС испраќа порака и ги застрашува судиите кои би одлучувале, но и го ограничува, односно намалува бројот на судии кои ќе постапуваат, рече на денешната прес-конференција Орце Ѓорѓиевски од ВМРО-ДПМНЕ.

Додаде дека треба да се има предвид дека ДИК е институцијата која ги спроведува изборите и одлучува за нивната регуларност и до која политичките партии поднесуваат приговори за изборни нерегуларности и која одлучува дали некаде ќе се прегласува. Со ставање под контрола на ДИК и Управниот суд, рече Ѓорѓиевски, се отвора патот да се местат локалните избори и да се изигра волјата на граѓаните.