ВМРО-ДПМНЕ: СДСМ сака да ја девалвира изградбата на автопатот Кичево-Охрид

ВМРО-ДПМНЕ тврди дека се лага и конструкција бројките коишто ги изнесе денеска министерот за транспорт и врски Горан Сугарески за направени дополнителни штети за граѓаните од изградбата на автопатот Кичево-Охрид. Целта, според Сугарески, е да внесат забуна и да го девалвираат проектот.

- Неспособноста и неработењето на владата на СДС стануваат алармантни.  Наместо по само пар недели владеење министрите од владата да одат на одмор, потребно е да се зафатат со работа. Министерот Сугарески наместо да лиферува лажни бројки и да креира конструкции треба да ги засука ракавите и да почне да си ги врши должностите, наведува ВМРО-ДПМНЕ во реакција.

Главната борба на владата на СДС, додава ВМРО-ДПМНЕ, се криминалните побуди, тие во изградбата на патиштата гледаат можност за екстра криминална заработка преку кочење и избор на нови фирми, кои граѓаните ќе ги чинат многу повеќе и поскапо. - Сугаревски денес си даде автогол. Ако има отстапки од самите проекти, тогаш за тоа единствено треба Сугаревски да побара вина во неговата партија чија влада ги изготви тие проекти, и никогаш не ги реализира, затоа што немаше доволно капацитет и компетентност за тоа, истакнува ВМРО-ДПМНЕ.

Според ВМРО-ДПМНЕ, СДСМ во текот на изборната кампања ветувале 600 километри автопат и 550 километри магистрални патишта, за сега, стои во соопштението, да гледаме дека не се способни да ги довршат  автопатите кои ВМРО-ДПМНЕ ги започна и кои се во напредна фаза на реализација, а не пак да градат нови.