Властите на Барселона одбија да го прогласат шпанскиот крал за персона нон грата

Градските власти на Барселона решија да не го прогласуваат шпанскиот крал Фелипе Шести за персона нон грата во регионот.

Според весникот Периодико, малата левичарска партија Кандидати за народно единство, која е една од партиите кои се залагаат за независна Каталонија, побарала на кралот да му се забрани влез во Каталонија. Комисија на Градскиот совет на Барселона го разгледала барањето, но не го прифатила.

Заменик градоначалникот на Барселона Жерардо Писарељо изјави дека не му се допаѓа непопустливиот став на шпанскиот крал во врска со референдумот за независност во Каталонија и насилната реакција на шпанската полиција.

Но, Писарељо сепак додаде дека изрекувањето забрана на кралот да влезе во Каталонија не би предизвикало никакво подобрување во напнатата политичка состојба.