Видегарај: Не ги прифаќаме новите предлози на САД

Мексико нема да ги прифати едностраните предлози на САД поврзани со имиграцијата и нема да се двоуми да се обрати до Обединети нации со цел да се заштитат имигрантите, изјави денеска шефот на мексиканската дипломатија Луис Видегарај пред средбата со високи американски претставници.

Новите предлози на САД ќе бидат главна тема на претстојните состаноци на мексикансите претставници со американскиот државен секретар Рекс Тилерсон и секретарот за внатрешна безбедност Џон Кели.

Тилерсон и Кели утре и в четврток ќе го посетат Мексико, во време на заладување на билатералните односи по доаѓањето на власт на Доналд Трамп.

Неодамна стотици луѓе формираа „жив ѕид“ во пограничниот мексикански град Сијудад Хуарез во знак на протест поради плановите на Трамп да подигне ѕид меѓу САД и Мексико.