Дрес на Вилт Чембрлен продаден за 4.9 милиони долари

Дрес на Лос Анџелес лејкерс, кој легендарниот кошаркар Вилт Чембрлен, го носеше во НБА финалната серија во 1972 година, е продаден на аукција за 4.9 милиони долари, соопшти денеска аукциската куќа Сотби.

Лејкерси во 1972 година ја освоија шампионската титула, совладувајќи го во финалната серија Њујорк со 4-1, а Чембрлен во петтиот натпревар постигна 24 поени и имаше 29 скокови и осум асистенции, иако играше со повредена десна рака.

Чембрлен ја почна професионалната кариера во 1958 година и освои две шампионски титули, четири пати беше прогласуван за најкорисен играч во регуларниот дел од сезоната, а еднаш во финалната серија.

НБА кариерата ја заврши во 1973 година со 31.419 постигнати кошеви. Почина во октомври 1999. на 63-годишна возраст.