Се уредуваат пешачки улици во Пехчево

Започна уредувањето со бекатон плочки на шест пешачки улици во Пехчево. Градоначалникот Игор Поповски истакна ќе се уредуваат вкупно 14 вакви улици, претежно наменети за пешаци.

- Ние набавивме околу три илјади бекатон плочки кои ќе ги намениме за уредување на сите мали улички во Пехчево. Стартуваме со уредување на шест улички во новата населба во Пехчево, каде работите треба да завршат за еден месец. Потоа во текот на годината, ќе продолжиме со уредување на уште осум улички, истакна Поповски.

Тој додаде дека уредувањето на овие пешачки улички е со средства во висина од три милиони денари обезбедени од буџетот на Општината.

- На овој начин ние ќе го решиме долгогодишниот проблем на жителите кои зимно време газеа кал, а летно се давеа во прашина. Така што и како пешачки зони ќе ги уредиме и ќе придонесеме за поголема безбедност на пешаците, рече Поповски.

Инаку, според Општината, од вкупната улична мрежа во Пехчево остануваат уште 15 проценти неасфалтирани улици. Инфраструктурата како проблем за решавање беше одбран како приоритет од граѓаните и на буџетските форуми на заедницата.