САД: Ако го укинете Специјалниот суд ќе го одобриме „рускиот“ Трибунал за ОВК

САД и се заканија на Приштина дека ако косовскиот Парламент го укине неодамна формираниот Специјален суд за воени злосторства, тогаш Вашингтон нема да го попречи руското барање за основање на Трибунал за воени злосторства во Косово на ниво на Обединетите нации, тврди приштинскиот весник „Коха Диторе“.

Весникот пишува дека вршителот на должноста амбасадор на САД во Косово, Стивен Бенкс деновие се сретнал со косовските политички лидери и им ја пренел заканата, која САД и претходно ја најавија како можност.

Русија бараше формирање на суд сличен на Хашкиот трибунал, кој ќе се фокусира на судски процеси против командантите на поранешната Ослободителна војска на Косово (ОВК), но САД досега се спротиставуваа на овој предлог и го блокираа во ОН.

Барањето на САД Специјалниот суд да продолжи да функционира го поддржаа и западноевропските држави.

- Нема никаква причина да се запре работата на Специјалниот суд и ги повикуваме сите раководители на институционалните органи, лидерите на партиите и пратениците да ја отфрлат секоја помисла за укинување или редефинирање на било кој аспект од законот за специјални судови, побараа вчера преку заедничко соопштение САД, Велика Британија, Германија, Франција и Италија. 

Косовските политичари првично се согласија со формирање на специјалниот суд и гласаа за измени на Уставот на Косово кои беа потребни за неговото формирање.

Но, неодамна пратеници од владејачкото мнозинство, во кое доминираат партии предводени од поранешни команданти на ОВК, предложија укинување на Судот. 

Косовскиот претседател Хашим Тачи, кој и е поранешен главен командант на ОВК, најави дека ќе ја потпише одлуката за укинување на Судит, доколку Парламентот ја изгласа.