Руски агент во Киев осуден на 15 години затвор за насочување напади во близина на Покровск

Агент на руската Федерална служба за безбедност (ФСБ), кој ја насочувал руската артилерија, ракетни и бомбашки напади кон украинските сили во еден од најжестоките фронтовски сектори — околината на градот Покровск — е осуден на 15 години затвор, соопшти Службата за безбедност на Украина (СБУ), пренесе агенцијата Укринформ.

Според обвинението, осудениот е 39-годишен рецидивист кој двапати претходно бил осудуван за грабеж. Во текот на првата казна, издржана во казнена колонија во окупираниот град Макеевка, бил регрутиран од офицер на ФСБ и ставен во т.н. „режим на чекање“.

По излегувањето од затвор пред почетокот на руската инвазија, се преселил во украинскиот град Билозерск во областа на Покровск. Кон крајот на 2024 година, добил инструкции преку апликација за пораки да испраќа координати на украински позиции.

„Го интересирале утврдувања, огнени позиции и резервни командни пунктови на украинската армија. Агентот лично ги следел движењата или ги набљудувал колоните од својот прозорец“, соопшти СБУ.

Тој бил уапсен во јануари годинава, а судот го прогласи за виновен за велепредавство за време на воена состојба.