Радев: Следната недела ГЕРБ ќе добие мандат за формирање влада

Бугарскиот претседател Румен Радев денеска најави дека следната недела ќе и го додели мандатот за формирање нова влада на партијата Граѓани за европски развој на Бугарија (ГЕРБ), која освои најголем број пратеници на предвремените парламентарни избори одржани на 26 март.

Како што јави БТА, Радев ваквата изјава ја даде пред денешниот почеток на конститутивна седница на новоизбраното Народно собрание на Бугарија.

Радев нагласи дека се надева оти новата влада ќе биде формирана на почетокот на мај и најави дека конструктивно ќе соработува со неа. 

Минатата недела ГЕРБ соопшти дека со коалицијата Обедините патриот постигнале договор за програмата за работа на нивната заедничка влада, која ќе биде предводена од лидерот на ГЕРБ, Бојко Борисов.

Според најавите, преговорите за распределбата на министерските ресори во новата влада ќе почнат во текот на оваа недела.