Путин ќе се обрати пред новинари на Меѓународниот економски форум во Санкт Петербург

Се очекува рускиот претседател Владимир Путин денеска во Санкт Петербург да одговара на прашања од западни новинари, во услови на војна во Украина и конфликтот меѓу Иран и Израел, објави ДПА.

На првиот ден од годишниот Меѓународен економски форум во Санкт Петербург, Путин ќе се сретне со претставници на меѓународни новински агенции за да ја презентира својата перспектива за глобалните прашања, соопшти вчера Кремљ.

Се очекува војната на Путин во Украина повторно да биде во фокусот.

Русија го користи форумот за да се спротивстави на меѓународната изолација, забележа ДПА. Форумот се смета и за место за заобиколување на санкциите против земјата богата со ресурси воведени како резултат на војната. Самата Москва ги нарекува казнените мерки нелегални.

Организиран е и бизнис дијалог меѓу Русија и САД, откако двете земји ги подобрија своите односи откако американскиот претседател Доналд Трамп дојде на власт.

Организаторите велат дека најголемиот економски настан во земјата минатата година привлече околу 22.000 учесници од 139 земји.

Путин планира да го одржи својот годишен говор за економската политика в петок и да одговори на прашања на панел.

На форумот присуствуваат многу претприемачи и говорници од западните земји.

Додека Русија продолжува да ужива во релативно висок раст благодарение на својата воена економија и продажбата на суровини, земјата се бори со висока инфлација и висока каматна стапка што ги прави инвестициите поскапи.