Пријателска средба и тренинг на Елиф и Урко

Деновиве по враќањето на Елмас во земјава и пред неговото повторно заминување во Италија, тој заедно со неговиот татко дојдоа на посета и пријателски тренинг во Магнус центарот. Ова не е нивна прва средба и прв тренинг. И порано Урко има работено кик бокс тренинг со Елиф.

“Елмас го знам од мал и долги години сме другари со неговиот татко кој ја има најголемата заслуга за неговиот успех. Елмас е прекрасно дете кое е растено во фамилија без пороци во која се негуваат сите човечки вредности: љубов, почитување, култура, одговорност, солидарност. Тој е особено талентиран спортист и исклучително е посветен на фудбалот поради што се откажува од многу удобности што ги нуди животот и особено младоста, но затоа пак е успешен во спортот. Кик боксот му ја подобрува координацијата, моториката и експлозивноста на движењата. Но и интелегенцијата како брзината на умственото размислување изнаоѓајќи соодветна варијанта за изведување на некое сложено движење во стресен момент. Можам да кажам дека Елиф е талентиран и за кик бокс и истиот го владее многу добро. Магнус центарот му стои на располагање за сите негови потреби во спортот“- изјави Дејан Митровски - Урко. 

Долгогодишното другарување со неговата фамилија беше причина и за подарок - дрес со неговото презиме што се поклопи и со роденденот на Урко и Урко го прими како драг роденденски подарок.