Патриотските здруженија побараа од Нимиц оставка од посредничката позиција

Со македонски знамиња и транспаренти со пораки, патриотските здруженија вечерва на протест пред Собранието на Република Македонија побараа оставка од медијаторот на Обединетите нации во спорот за името Метју Нимиц, кој денеска пристигна во Скопје и утре ќе има средби со државниот врв.

Учесниците во протестот побара од Нимиц да се повлече од, како што рекоа, срамната и недостоинствена понуда за предлог за името, со укажување дека македонскиот народ нема да прифати такви решенија. Според нив, проблемот за името е наметнат, крајно асиметричен и апсурден.

- Нимиц да престане да биде учесник во геноцидот и во уништувањето на македонскиот народ и држава, како и во повредувањето на македонскиот идентитет. Македонскиот народ нема да ги прифати овие решенија и ќе се бори со сите средства за враќање на одземениот суверенитет и за ревизија на сите спорни одлуки против државните интереси. Метју Нимиц да достави извештај до ОН дека македонскиот народ бара од него неотповиклива оставка на медијаторсата позиција и дека сака Република Македонија да биде примена на ОН под уставното и државото име, порачаа учесниците во протестот.