Падна албанската мафија, уапсени 64 нејзини членови во голема акција на Европол

Со поддршка на Европол, 64 припадници на албанска организирана криминална група се уапсени меѓу 3. и 5. април.

Тие се уапсени во текот на истовремени полициски операции спроведени во Белгија, Франција, Холандија и Италија, во која учествувале околу 600 полицајци.

Се верува дека осомничените илегално произведувале и тргувале со дрога и дека се поврзани и со трговија со луѓе, проституција и перење на пари, соопшти Европол.

Наведената полициска акција ја следи и сложена истрага која се занимава со активностите на оваа организирана криминална група која делува во Белгија, Франција, Холандија, Италија и Велика Британија, а се верува дека осомничените управувале со плантажи со канабис распоредени ширум Белгија и на северот од Франција, а некои од нив исто така биле вклучени во трговија со луѓе во Франција.

Во оваа полициска операција се уапсени 55 лица во Белгија, вклучувајќи ги и водачите на оваа криминална група, 7 лица во Холандија  и уште две лица во Франција, а во акцијата покрај белгиската, учествувале и француската, италијанската, холандската и британската полциија, а Европол ја поддржа истрагата, овозможувајќи размена на информации, проверка на податоци во реално време и друга потребна техничка поддршка.

До денешниот ден во оваа истрага се затворени 15 плантажи со канабис и запалени 8.255 стебла од канабис, околу 100.000 евра во готово и во злато, 4 луксузни возила и 63 електронски уреди.

Албанскиот организиран криминал и натаму претставува проблем за сите земји во Европа, а тоа е закана која Европол ја сфаќа многу сериозно. Се очекува операции од овој тип и во блиска иднина, како одговор на полицијата на овој вид на криминални активности, се наведува на крајот од соопштението на Европол.