Нови рестрикции во Црна Гора, се забранува работата на дискотеките и ноќните клубови

Согласно претходните најави на црногорското Министерство за здравство, кое упорно повикуваше на почитување на пропишаните мерки и предупредувања, со напомена дека тие ќе бидат променети во случај на непочитување, од денес на сила ќе стапат нови рестрикции кои се најавени како привремени, објави „Вијести“ од Подгорица.

Од петок, 23 јули до понеделник, 2 август, привремено се забранува работата на ноќните клубови и дискотеки, и на отворено и на затворено.

Забранети се забавите и музичките фестивали, како и сите масовни собири во затворени простории.

„Вијести“ дознава дека од 2 август, престојот во внатрешноста на угостителските објекти нема да биде можен безусловно.

Во фокусот на Дирекцијата за инспекциски работи ќе биде контролата на собирите на отворено и живата музика во летните бавчи на рестораните. Доколку продолжи трендот на прекршување на мерките, ќе се разгледа укинување на дозволите или дополнително ограничување.