Седница на Уставен суд

Уставниот суд на Република Македонија на денешната седница го укина членот 18, став 4 од Законот за управна инспекција, кој гласи „против решението на министерот не може да се води управен спор“.

Одредбата е укината бидејќи законодавецот пропуштил да ја отстрани од претходниот закон и за да не дојде до забуна, бидејќи министерот не носи веќе решение туку Второстепената државна комисија, која е формирана за одлучување во втор степен во областа на инспекцискиот надзор и прекршочната постапка и против ова решение може да се поведе управен спор пред надлежниот суд.

Судот денеска не поведе постапка по иницијативата поднесена на член 73 од Законот за работните односи, по иницијативата поднесена на член 9, став 3 од Уредбата за определување на условите и начинот на доделување националното спортско признание за врвно спортско остварување и висината на паричниот надоместок, како и по иницијативата поднесена на Одлуката за усвојување на годишната Програма за поставување времени објекти на општина Охрид за 2016 година.