Металург со победа го заврши настапот во СЕХА лигата пред домашната публика

 Македонскиот ракометен вице-првак Металург славеше победа над словенечкиот шампион Горење Велење во натпреварот од регионалната СЕХА лига. 

 

На средбата која се играше вечерва во СЦ „Борис Трајковски“ во Скопје, инаку последна за Металург на домашен терен, тимот од Автокоманда го совладаа Горење Велење со 28-25 полувреме 14-15. 

 

До петата победа во СЕХА лигата, тимот на Металург го предводеа Вања Лилиќ со 7 голови, Филип Кузмановски кој постигна 5 и Немања Обрадовиќ со 4 гола. 

 

Одлични беа и двајцата голмани Дарко Арсиќ и Мартин Томовски кои имаа по 10 односно 5 успешни одбрани. 

 

Во последните два меча во СЕХА лигата, Металург ќе игра на гостински терен против Извиѓач (28 фвруари) и Нексе (7 март).

 

Последниот пак свој натпревар од групната фаза македонскиот шампион Вардар ќе го игра на 14 март кога ќе му гостува на последно пласираниот Извиѓач. 

 

Табела: Вардар 44 бодови, Веспрем 41, ППД Загреб 31, Целје 30, Мешков Брест 29, Металург 16, Нексе 15, Горење Велење 12, Татран Прешов 10 и Извиѓач 3.