Македонија го промовира активниот туризам на Саем во Словенија

Агенцијата за промоција и поддршка на туризмот на Република Македонија втора година по ред го промовира активниот туризам на Саемот за туризам Natour Alpe Adria во Љубљана, Словенија.

Покрај активниот туризам, Агенцијата за туризам промовира и традиционална македонска храна и вино, а посетителите имаат можност да дегустираат и македонски ајвар и сирење. 

Делегацијата на Агенцијата за туризам, на Саемот во Словенија на кој се присутни 330 тур–оператори од 15 земји, оствари средби со претставници на авионската компанија Adria Airways, кои покажале интерес за зголемување на бројот на патници од Љубљана до Скопје.

Од Агенција за промоција и поддршка на туризмот на РМ посочуваат дека значајни се и средбите со тур-операторите Kompas, Oscar, Elephant travel, Slovenia Experience, како и со Асоцијацијата на словенски водичи, со кои е договорена соработка за споделување на експертиза и професионално искуство за основање на одржлив етички кодекс на туристичките водичи.

Новинарите од Словенија, посебно од Здружението на новинари FIJET, пројавиле интерес за винската рута и планинскиот туризам, изразувајќи желба да ја промовираат и туристичката понуда на Скопје и Охрид.

На четиридневниот саем за туризам во Љубљана, кој завршува денеска, ко-егзибитор на штандот на Македонија е тур-операторот Бадем Тур, информираат од Агенција за промоција и поддршка на туризмот на Република Македонија.