Груевски: Четврта инвестиција за 6 дена, продолжуваме да се бориме за секое работно место

Лидерот на ВМРО-ДПМНЕ, Никола Груевски преку својот Фејсбук профил ја поздрави одлуката за инвестирање на компанијата Innofruit.

Добра вест. Нова инвестиција во земјоделскиот сектор за нови вработувања и изградба на откупно дистрибутен центар за земјоделски производи во јужниот дел на државата. Имено холандската компанија Innofruit одлучи да инвестира во Македонија, каде освен обработка на земјоделско земјиште и производство ќе се занимава со откуп и извоз на земјоделски производи. Ќе се вработат 130 луѓе, од кои поголемиот дел ќе бидат постојано ангажирани, а дел времено. Инвестицијата ќе се протега на 250 хектари државно земјиште и е од исклучително значење за Јужниот дел на Македонија, општините Дојран и Богданци. Компанијата, преку јавна електронска аукција, го откупи имотот на некогашниот комбинат Агро Лозар од Богданци со што уште еден пропаднат капацитет ќе биде ставен во функција. Се работи за инвестиција на компанија со искуство во земјодеслкото производство како и во откуп и дистрибуција на земјоделски производи. Компанијата е дел од Olympic food group која поседува најсовремен логистички центар за испорака на овошје и зеленчук за пазарите во Европа и Азија. Нивниот план е многу брзо да започнат со подигање на насади со најсовремени високорпиносни сорти на цреши и трпезно грозје, како и изградба на современ дистрибутивен центар за откуп на земјоделски производи во Дојран кои ќе се извезуваат надвор од државата. Тоа ќе биде од огромна помош за македонските земјоделци. Разговорите за инвестирање траеа подолго време, а особено значаен беше ангажманот на Ванчо Костадиновски. Македонија беше избрана за финална дестинација за инвестирање во конкуренција од повеќе земји од регионот. Ова е 4-та инвестиција за 6 дена. Продолжуваме да се бориме за секое работно место, за секоја нова инвестиција која ќе значи подобар стандард за граѓаните. Нека е среќно!