Во Куманово потпишан меморандум за соработка за програмата за изучување англиски јазик

 

Дваесет и пет ученици од „Перо Наков“ од паралелеките на македонски и албански јазик, две години ќе изучуваат англиски јазик, американската култура, обичаи и традиции.

 

- Аксес програмата веќе втора година се имплементира во Македонија , поддржана е од американската амбасада во Скопје и ја спроведува Македонскиот центар за граѓанско образование. Програмата е наменета за изучување на англискиот јазик, американската култура, обичаи и традиции преку некласичен начин со интерактивно изучување на програмата. Проектот е предвиден да трае две години, изјави Маја Костовa од Македонски центар за граѓанско образование. 

 

Директорката на училиштето „Перо Наков“, Лидија Тасевска информира дека кумановското училиште е второ во Македонија каде што се импелементира програмата. 

 

- Ќе бидат вклучени ученици од различни етнички заедници, што значи дека ќе има можност и за дружење и за соработка, пријателство и за учење. Предавањата ќе се одвиваат во библиотеката ,која што дополнително ќе биде опремена од организацијата со најсовремени средства, што исто така ќе бидат добар бенефит за училиштето, изјави Тасевска.

 

Градоначалникот Дамјановски по потпишувањето на меморандумот за соработка изјави дека учениците ќе имаат можност да учествуваат на летни кампови и оти проектот ќе придонесе за зближување на учениците од различните етнички заедници во градот.