Најмалку четворица погинати и тројца исчезнати во првата бура на атлантското крајбрежје

Тропскиот циклон во Атлантскиот Океан достигна степен на бура и се движи кон источното крајбрежје на САД, соопшти Националниот центар за урагани, цитиран од светските агенции.

Најмалку четири лица погинаа, а тројца се исчезнати, вклучувајќи и 11-годишно дете, во поплавите кои ги предизвикаа големите дождови и излевања на реки во американските држави Тексас и Канзас, додека тропската бура Бони го погоди брегот на Јужна Каролина.

Надојдените реки однесоа патишта во Тексас и Канзас, при што четири лица настрадаа, наведуваат американските медиуми.

Спасувачките служби на градот Вичита, во Канзас, трагаат по дете кое во петокот вечерта било однесено од надојден поток.

Во близина на градот Остин, во Тексас, властите денеска ќе ја продолжат потрагата од воздух по двете лица, кои се наоѓале во автомобили на поплавен пат.

Тропската бура Бони, права годинава, вчера пристигна во Јужна Каролина на четири дена пред официјалниот почеток на сезоната на урагани во Атлантскиот Океан, но евакуација на населението не беше прогласена.

Се очекува до попладне Бони да стигне до брегот јужно од Чарлстон. Центарот на бурата се наоѓа на околу 195 километри југоисточно од градот, а брзината на ветрот достигнува околу 65 километри на час.