Силна експлозија на аеродромот во Ријад, авиокомпаниите откажуваат летови

Силна експлозија одекна денеска на аеродромот во главниот град на Саудиска Арабија, Ријад, додека се интензивираат ракетните напади на јеменската група Хути врз тоа кралство.

Медиумската служба на саудиската влада и Управата за цивилно воздухопловство на Саудиска Арабија засега не ја коментираа ситуацијата.

Меѓународниот аеродром „Крал Халид“ ги повика патниците директно да ги контактираат своите авиокомпании и да го проверат статусот на летовите пред да пристигнат на аеродромот.

Во меѓувреме, компаниите „Етихад ервејз“ и „Катар ервејз“ откажаа повеќе летови кон Ријад, при што некои од откажувањата се однесуваат и на понеделник.

Денешната експлозија следуваше по нападите врз аеродромот во Ријад претходно оваа недела, во кои четири лица загинаа, повеќемина беа повредени, а авион на компанијата „Саудија“ беше оштетен.

Овие напади наведоа бројни авиопревозници да ги одложат или откажат летовите кон престолнината на Саудиска Арабија, и тоа непосредно пред одржувањето на големи конференции за енергетика и инвестиции во Ријад.

МИА